2024 yil boshidan, Ramazondan avval jang o'tkazishni so'ragan Islam Maxachev nihoyat Dastin Pore bilan to'qnash keladigan bo'ldi. To'g'risini aytganda, Pore Benua Sen-Denini nokautga uchratib, mag'lub etgach, chempionlik kamari uchun bahs olib borishi haqida mish-mishlar tarqala boshlagandi. Bundan tashqari, amerikalik jangchi to'qnashuv elon qilinishidan bir hafta oldin chempionlik jangiga hozirlik ko'rayotganini malum qilgandi. “Keyingi nishon Islam Maxachev. Yuqoriga chiqish vaqti keldi”, degandi Dastin.
Nomzodning tanlovi aniq emas. Ha, Pore katta nom va Maxachevning mashhurligini ko'tara oladigan darajadagi yulduz. U unvonga loyiqmi? So'nggi jangida amerikalik divizionning 12-raqamli jangchisi bilan bellashgani uning imkoniyatlarini to'laqonli baholash uchun etarli emas. Biroq, Dastin foydasiga ishlovchi muhim omil mavjud. U mart oyining boshida jang qildi va keyin iyun oyida chempionlik jangini qabul qilishga tayyor ekanligini oshkor qildi. “Olmos” Sen-Denis bilan dueldan keyin jiddiy jarohatlarsiz chiqib ketishga muvaffaq bo'ldi. SHu bilan birga, CHarlz Oliveyra, Arman Carukyan va Jastin Getji timsolidagi boshqa davogarlar UFC 300 turnirida ishtirok etib bo'lishdi va yoz boshida bo'lib o'tuvchi UFC 302'ga qadar tiklanishi qiyin masala hisoblanadi. SHu tufayli Dastin ushbu maqomga musharraf bo'ldi.
Rossiyalikning murabbiyi Xaver Mendez ham Maxachev qolgan raqiblarni kutishidan ko'ra, Pore bilan kurashish eng maqbul variant ekanligini takidladi. “Islam o'zini himoya qilishga tayyor bo'lgan paytda jang qilishni istaydigan haqiqiy professional. U faqatgina Ramazon oyi va undan qisqa vaqtdan keyin jang qilmaydi, xolos. Agar Dastin keyingi raqib bo'lsa, bu ajoyib, mabodo Getji bo'lib qolganida ham bu yomon bo'lmasdi. Getji va Oliveyraning jang natijalari qanday bo'lishini bilmaymiz. Ehtimol, kimdir jarohat olar. SHunda Maxachev qachongacha kutishi kerak. Demak, men Pore variantini yoqlayman. Uning hech qanday jarohati yo'q, u o'z uslubiga ega jangchilardan sanaladi”, degandi Mendez yubiley turnirdan avval. Qolaversa, bu rossiyalik uchun juda qulay vaqt oralig'idir. Agar iyun oyida bahs bo'lib o'tsa, u yil oxirigacha tiklanishi va yana musobaqalarda qatnashishi uchun etarlicha vaqt bo'ladi.
35 yoshli amerikalik uchun, bu katta ehtimol bilan chempionlikni qo'lga kiritish uchun so'nggi imkoniyat. «Olmos» vaqtinchalik unvonni olgan va munosib ravishda UFC shon-shuhrat zalining yulduzi va bo'lajak azosi hisoblanadi, ammo Luizina shtatida tug'ilgan sportchi hali asosiy sovrinni qo'lga kirita olganicha yo'q. Uni ilk bor Xabib Nurmagomedov mag'lub etgandi. O'sha jangnii ko'pchilik yaxshi eslasa kerak. Keyinroq Dastin Oliveyraga yutqazib qo'ydi. Har ikki engil ham bo'g'ish uslubi orqali sodir bo'ldi. Maxachev hamda Dastin asta-sekin jangga qiziqishni kuchaytira boshladi. Ular ijtimoiy tarmoqlar va ommaviy axborot vositalari orqali «dahanaki janglar»ni to'xtatishgani yo'q. Islam Dastin chempionlik jangiga loyiq emasligini takidladi: «Ha, Pore kamar uchun kurashiishga noloyiq, lekin bizda boshqa imkoniyat yo'q, hamma band. Men bo'lsa oktagonga kirishni istayman. Dastinga qarshi bahsdan so'ng yil oxiriga qadar yana bitta jang bo'ladi. U oxirgi to'qnashuvida ajoyib nokaut evaziga g'olib bo'ldi. U sog'lom va tayyor, shuning uchun men amerikalikka qarshi bahs olib bormoqchiman. Dastin yaxshi raqib».
Habib Jo'raboev tarjimasi
