SportUz.Net
logo

photo photo

Iqboljon Xoldorov: "Debyut jangimdagi g'alabani Onamga bag'ishlayman"

03.04.2021 19:20    


Rasmni yuklab olish

"Humo Arena" mezbonlik qilayotgan professional boks kechasini tezkor nokaut bilan boshlab bergan charm qo'lqop ustamiz Iqboljon Xoldorov jangdan so'ng saytimiz muxbirlari uchun intervyu berdi.

Xoldorov prof boksdagi debyut jangida tanzaniyalik Kulva Bushiriga qarshi ringga ko'tarildi va 6 raundga mo'ljallangan jangda raqibini ikkinchi raundda nokautga uchratdi. 

- Ochig'i, asosiy etiborni raqibimni nokaut qilishga qaratmadim, deya so'z boshladi Xoldorov. - Professional ringdagi birinchi jangim bo'lgani uchun chiroyli harakatlar evaziga g'alaba qozonish uchun intildim. CHiroyli jang o'tkazsangiz, nokaut o'zi kelaveradi.   

- Bugungi g'alabangizni kimga bag'ishlaysiz?

- SHubhasiz, meni dunyoga keltirgan Onamga! Odatda onam jangimni ko'rmaydilar. Lekin bugun ular "Humo Arena"dalar. Onajon, sizni yaxshi ko'raman.   


- Iqboljon, bokschilarimizning bugungi ishtirokini boshlab berdingiz. Bu sizga qo'shimcha bosim yuklamadimi?

- O'rta vazn toifasi vakili bo'lganim uchun odatda boks oqshomlarining teng yarimlarida ringga chiqardim. Endi bugun prof boksdagi debyut jangim bo'lgani uchun oqshomni boshlab berish mening chekimga tushdi. Kecha tarozidan o'tish marosimida ikkinchi bo'lib chaqrilgandim. SHundan kelib chiqib bugun oqshomni boshlab bersam kerak deb o'ylamagandim. Ertalab murabbiylar birinchi bo'lib ringga ko'tarilishimni aytishdi. Aksincha, birinchi bo'lib boshlash menga yoqdi. Mening g'alabam qolgan bokschilarimizga ruhiy ustunlik berishiga ishonaman. 

- Professional boksda yo'nalishlar ko'p - WBC, WBA, WBO va IBF. Siz qaysi yo'nalishdan ketmoqchisiz?

- Hozir bu haqida hech narsa deya olmayman. Endigina birinchi jangimni o'tkazdim. Vaziyatga qarab ish tutaveramiz. O'rganib chiqaman va o'zimga qulay yo'nalishlarda ringga chiqaman.        


- Sizni ringda ko'rmaganimizga ham ancha bo'lgandi. Oxirgi rasmiy jangingiz qachon o'tkazilganini eslay olasizmi?

- Bir yarim yilcha vaqt bo'ldi. Jarohat va pandemik vaziyat sabab ko'proq dam olishimga to'g'ri keldi.


- AQSHga qachon jo'nab ketasiz?

- Bugun promouterlar jangimni bevosita arenada tomosha qilishdi. O'ylaymanki, bu jarayon cho'zilib ketmaydi. 

Xurshida Abdiqulova yozib oldi



Futbol yangiliklari || Futbol habarlari || Футбол янгиликлари || Футбол хабарлари
Дўстларга юборинг: