Birinchi o'rta vazn toifasida vaqtinchalik WBC chempionlik kamari sohibi bo'lib turgan Verjil Ortis navbatdagi jangini yarimo'rta vaznda sobiq jahon chempioni Errol Spensga qarshi o'tkazishi mumkin. Bu haqda Ortisning promouteri Oskar De La Xoyya xabar bermoqda.
Qiziq tomoni shundaki, har ikki bokschi ham Texas shtatida yashaydi. Promouterning so'zlariga ko'ra, aynan shu omil jangning tomoshabop o'tishiga zamin yaratar ekan. Jang "Dallas Kovboys" futbol klubiga tegishli katta stadionda o'tkazilishi mumkin.
"Verjilda navbatdagi jang uchun variantlar etarli. Tasavvur qiling, agar biz bu jangni "Dallas" klubining stadionida tashkil eta olsak, arenaga muxlis sig'may ketadi. Bu jang haqida o'ylab ko'rish kerak", — deya FightHype nashriga intervyu bergan De La Xoyya.
Eslatib o'tamiz, 27 yoshli Ortis ketma-ket ikkita jiddiy raqiblar bilan jang o'tkazdi. U avvaliga ukrainalik Sergey Bogachuk, keyin esa hamyurtimiz Isroil Madrimovni 12 raund to'liq davom etgan janglarda ochkolar hisobiga ko'ra mag'lubiyatga uchratdi. Bir muddat avval De La Xoyya Ortisning IBF chempioni Baxram Murtazaliev ham jang o'tkazishi mumkinligini aytgan edi.
Malumot uchun, 35 yoshli Errol Spens 2023 yilning yozidan beri jang o'tkazmayapti. O'shanda u Terens Kroufordga yutqazib qo'ygandi. Avvalroq, Premier Boxing Champions kompaniyasi Spens uchun birinchi o'rta vaznda WBC va WBO yo'nalishlari chempioni Sebastyan Fundoraga qarshi jangni tashkil qilmoqchi bo'lgandi. Ammo Errol Fundoraga qarshi ringga chiqishdan bosh tortgan edi.
Bahodir Jalolov: "Dichko bu jang orqali ko'p narsa yutqazmasligi mumkin, ammo men..."