UFC 296 turnirining asosiy kardidan o'rin olgan bitta jang bekor bo'lish arafasida turibdi. Bunga Giga CHikadzening jarohati sabab bo'lmoqda. Yarim engil vazn toifasi reytingida 8-o'rinni egallab turgan gruziyalik aralash yakkakurash ustasi o'zidan ikki pog'ona yuqorida borayotgan Josh Emmettga qarshi oktagonga chiqishi lozim edi.
"Afsuski, son qismimning mushaklarini cho'zib oldim. Tez orada qaytaman!", - deya o'zining ijtimoiy tarmoqdagi sahifasida xabar qoldirgan Gika.
Hozircha Emmett turnir kardida qoladimi, unga qisqa muddatda jang beriladimi, bunisi noaniq. Lekin amerikalikning o'zi bir necha raqiblarni aytib, ular bilan jang qilish istagini bildirgan. Ammo raqiblar qisqa muddatda bu "vyzov"ni qabul qiladimi? Hamma gap shunda.
Malumot uchun, CHikadze shu yilning avgustida Aleks Kaseresni ochkolar hisobiga ko'ra mag'lubiyatga uchratgan edi. Ungacha 35 yoshli aralash yakkakurash ustasi UFC promoushenidagi hozircha yagona mag'lubiyatini qabul qilib olgandi. O'shanda u Kelvin Kattarga ochkolar hisobiga ko'ra yutqazib, o'zining 7 ta g'alabali seriyasiga chek qo'ygandi.
Amerikalik 38 yoshli Josh Emmett esa so'nggi ikkita jangida mag'lubiyat alamini totib ko'rgan. Avvaliga vaqtinchalik kamar uchun kechgan jangda Yair Rodrigesga, keyin esa Iliya Topuriyaga imkoniyatni boy berib qo'ygan edi. Undan avval esa u ketma-ket 5 ta jangda zafar quchgandi.
Eslatib o'tamiz, UFC 296 turnirining asosiy jangi yarim o'rta vazn toifasi chempionlik kamari uchun Leon Edvards hamda Kolbi Kovington o'rtasida bo'lib o'tadi.
