Dog'iston vakilining UFC'dagi faoliyati ajoyib tarzda o'tdi. U yarim engil vaznning eng zo'rlaridan biri edi. Yana bitta jangdan so'ng Zabit kamar uchun oktagonga ko'tarilishi lozim edi, biroq ketma-ket ikkita jangdan bosh tortdi va u UFC radaridan yo'qolib qoldi. UFC uzoq vaqt davomida yulduzini reytingda ushlab turdi, biroq sabrning ham oxiri bor edi - UFC Zabitni reytingdan chetlatdi. Rossiyalik esa yozda umuman faoliyatini yakunlaganini elon qildi. Ammo kuni kecha Zabit yana faoliyatini tiklayotganiga shama qildi.
Magomedsharipovning MMAdagi faoliyati yaxshi o'tdi deyish mumkin. UFC'ga o'tguniga qadar rekordi 12-1 edi. Zabit UFC'da 6 ta jangda ishtirok etdi va barchasida g'alaba qozondi. U boshqa dog'istonliklardan farqli ravishda jangda to'liq turib harakat qilishni ham bilardi. U hech qachon boksdan qochmagan. Uning janglaridan barcha "kayf" qilardi. Biroq kutilmaganda, hech qanday sababsiz Zabit faoliyatini yakunladi.
Endi Zabit qaytmoqda. Qaytishini birinchilardan bo'lib Xabib Nurmagomedov malum qildi.
"Biz u bilan tez-tez gaplashib turamiz. Oramizda yaxshi munosabat bor. U qaytadimi-yo'q, buni bilmadim. Lekin u menga o'xshab hech kimga vada bermagan. Agar unga yaxshi taklif berishsa, u qaytishi mumkin", - deya fikr bildirgandi Xabib.
Bu fikrlardan so'ng Zabit ham "tilga kirdi". U ijtimoiy tarmoqda qaysidir hujjatga qo'l qo'yganini malum qildi. Agar u UFC'ga qaytishni reja qilgan bo'lsa, hozir ayni vaqti!
UFC'da oxirgi yillarda yarim engil vaznda hech qanday intriga yo'q. Aleks Volkanovski istagan raqibini istaganicha mag'lub etmoqda. Zabit uch yildan beri jang qilmagan bo'lsa ham, u vaznning istalgan jangchisidan xavfliroq. Zabitga bittada chempionlik jangi berilmasligi mumkin, lekin u qaytsa, yaqin ikki yoki uchta jangdan so'ng kamar uchun oktagonga ko'tariladi.
Zabit endi 31 yoshga kirdi. UFC uchun ham dog'istonlikni qaytishi ancha foydali. Ularga kuchli jangchilar kerak. Magomedsharipov ham ikkinchi harakatda chempionlik kamariga ega bo'lish imkoniyatidan foydalanishi mumkin.
