U chempionlik jangida kamar sohibi Josh Uorringtonga qarshi ringga ko'tarildi va to'qqizinchi raundda chempionni nokautga uchratdi. Bu 22 yoshli Laraning faoliyatidagi muddatidan avval qozongan 15-g'alabasi bo'ldi. Maurisio hisobida umumiy 22 ta jangdan 20 ta g'alaba bor. Ikki bor mag'lubiyat alamini totib ko'rgan.
Josh Uorrington esa faoliyatidagi ilk mag'lubiyatini qarshi oldi. U 2018 yilning may oyidan beri IBF chempionlik kamarini o'zida saqlab kelayotgandi. O'shanda u Li SHelbidan ustun kelgandi. Uorrington faoliyati mobaynida 31 ta jang o'tkazib, 30 tasida zafar qozongan edi.
Darvoqe, Maurisio Lara ilk bor Evropada jang o'tkazdi. Bungacha u Meksika va Argentinada o'z janglarini o'tkazib kelayotgandi.
